Carnascèr 2023

L Carnascèr l é n temp del an rich de color, ac e musega che ge sà bel tant ai gregn che ai picioi. Chest an i Servijes linguistics e culturèi del Comun General de Fascia à volù ge sporjer n don creatif a duc i bec e la bezes de Fascia per poder se endrezèr enstesc l guant da jir a mèscra.
L projet, vegnù fora da na colaborazion di meisc passé col joen artist Ismaele Soraperra, l à lurà fora a na vida scempia la faceres e la capes de la Gran Mèscres – Laché, Bufon e Marascons – per poder meter a la leta di bec e de la bezes, tant a scola che te la families, n laboratorie creatif.
Sun chesta piata internet se pel desćiarièr vigni setemèna n file nef.

Co la pruma setemèna de Carnascèr l é a la leta l file “Laché”, l ambasciador de la mèscres, chel che aur l Carnascèr. Tel file l é la facera, la capa, la mesacoudes de gial sforcel e la cordeles da color da taèr fora e meter ensema: serf demò na forfesc, na cola e, con mingol de fantasia, vigniun pel personalisèr sia mèscra.
Chi che à gust pel manèr ite na foto col lurier fat a cultura@cgf.tn.it

L projet l jirà inant la setemènes che vegn co la facera da Marascon, da Bufon e tinultima con chela da burt.

Te la puntata de Pedies #365 – la troède sul canal TV LADINA de YouTube – l é n gustegol servije che moscia co les meter ensema, fat dessema co la animadores e i bec del projet “Ensema se muda”.

Se ence vo volede les fèr a cèsa podede desćiarièr i file chiò sotite, e se volede ence cognoscer duta la neves dai Servijes linguistics e culturèi del Comun General de Fascia, enscinuave a noscia newsletter tras l formulèr junsom a la piata. A prest!


Download “Laché”
Download “Marascon”