Aisciuda Ladina 2021

Descheche l’é stat fat l’an passà, ence chest an l’Aisciuda Ladina la vegnarà endrezèda on line, amancol per la pruma pèrt perveduda d’aisciuda, te la setemèna dai 3 ai 8 de mé, col meter ite de neves contegnui tel sit internet enjignà del 2020 apontin per chest event.

L’argoment de l’ambient, de la natura e del teritorie l vegnarà portà dant ence chest an: de fat l’é dassen emportant fèr na reflescion en cont de la doura del teritorie e di mudamenc climatics che à fat vegnir ca, ti ultimes egn, sacotenc dejastres naturèi ence te noscia valèdes (recordon la egajons e la tampestèda VAIA).

Apede i saluc istituzionèi di Enc e de la Sociazions che ogne an endreza l’Aisciuda Ladina (Comun General de Fascia, Istitut Cultural Ladin, Union di Ladins de Fascia e Scola Ladina de Fascia) e l salut de la mascotte de chest event, Bertol, vegn tout ite persones che laora a contat co la natura o che se cruzia, te desvaliva vides, de ambient e teritorie, e tor sù si pensieres da meter fora con de curc video.

L’Union di Ladins de Fascia la endrezarà, a tachèr apontin da la setemèna de l’Aisciuda Ladina per jir inant ti meisc dò, raides sul teritorie te picoi gropes, en segureza, compagné da esperc.

L’Istitut Cultural Ladin l jirà inant co la scomenzadiva AlberEL che, en colaborazion co la firma ELEL, tras la venuda de picoi èlbres de creida depenta a man, l binarà sù scioldi per empiantèr ite da nef l bosch de la Val de Sèn Nicolò dessatà da la tampestèda Vaia del 2018.

L Comun General l metarà fora (per ades sul sit e più inant ence sul papier) i prumes doi Codejìe de la neva colèna “Entener e se fèr entener” dedichè a la mont: n “Codejel de la regoles de bona creanza per jir sa mont” e n “Glossèr de la paroles del bosch”, olache vegn metù dant la paroles che vèrda i lurieres da boschier, i èrc da zacan e daldidanché, la piantes, i fiores e i fonches, e ence i personajes mitologics de la veia contìes.

Ajache l’an passà no se à podù per via de la pandemìa, vegnarà dat fora chest an te la Scoles de Fascia i codejìe “Mia reijes”, olache scolees e studenc i vegn envié a scriver ite pensieres, poesìes, idees, o a ge encolèr sù fotografìes, foes, fiores e dut chel che pel ge saer enteressant; dapò i podarà ge manèr ite al Comun General la fotografìes de la piates più beles o i video di momenc da recordèr de sia raides, che i vegnarà ciarié sul sit de l’Aisciuda Ladina.

Per chest uton che vegn, semper che l’emergenza sanitèra la dae l met, l’é stat pissà de endrezèr n convegn interladin, semper en cont de teritorie e ambient, vedù dal pont de veduda naturalistich, sozièl, ambientèl, turistich.

Enlouta, apede envièr ghesć da l’autra valèdes ladines, vegnarà endrezà la prejentazion ofizièla di prumes doi Codejìe, da dèr fora te la Scoles, te la sezions del Museo Ladin, ti ofizies de l’APT, te la sentes di Menacrepes e di Compagnadores del Teritorie e coscita inant.

L’event l sarà compagnà da na raprejentazion de teater e da na mostra fotografica.

Ve speton!