Aisciuda Ladina 2023

LENGAC CHE SE SCONTRA,
COMUNANZA CHE CRESC

Ence chest an l é ruà l’Aisciuda Ladina, festa del lengaz e de l’identità. Ma che velel pa dir identità anchecondì? Aldidanché la seides del sentiment de identità les doventa tras più avertes e l conzet de “identità” l tol su segnificac desvalives. L é apontin per chesta rejon che l Comun General de Fascia, l Istitut Cultural Ladin, la Scola ladina de Fascia e l’Union di Ladins de Fascia i a volù colaborèr a na vida che duc posse se sentir pèrt de na tera che à na gran richeza da rencurèr e no destrabonir, per crescer adum desche persones e desche comunanza.

Chesta Aisciuda Ladina la ne met dant sacontanta ativitèdes, per esser ben segur la festa del lengaz e de l’identità ladina, ma ence de duc i etres lengac e de la cultures che vif te noscia val, ge recognoscian a ogneun la dreta emportanza e l derit de vegnir stravardà e tegnù su. Ogneun de nos doventa più rich canche se troon con de autra persones, con de autra cultures e sessaben con etres lengac.
Tol pèrt ence tu co nos a l’Aisciuda Ladina!