L’emergenza sanitèra met online dai 4 ai 9 de mé la scomenzadives del »Festival del Lengaz«, che te sia doudejeisema edizion fèsc festa per i 100 egn da l isituzion de la bandiera ladina
I cent egn de la bandiera ladina, tachèda fora per la pruma outa sun Jouf de Frea ai 5 de mé del 1920, i doventa, dai 4 ai 9 de mé, l argoment prinzipèl de l’Aisciuda Ladina, Festival del Lengaz 2020, portèda inant dal Comun general de Fascia en colaborazion con la istituzions che se cruzia de fèr cognoscer e slarièr fora l lengaz e la cultura.
La numer 12 se met dant per forza desche na edizion fora de anter, a cajon da la mesures per l stravardament de la sanità publica tel temp del coronavirus, che les à cognù fèr pissèr a na neva vida de portèr dant la manifestazion che valorisea e palesa la identità, la cultura e l lengaz de la popolazion fascèna.
Per chest l staf di Servijes Linguistics e Culturèi del Comun general de Fascia, vidà da la responsabola Sabrina Rasom, se à pissà de tor chesta ocajion per enjignèr n nef sit internet dedicà a l event che oramai da passa 10 egn viventea ogne an la comunanza de Fascia la pruma setemèna de mé, ma che no l aea amò na bela vedrina dedichèda su la gran strèdes del web.
L é nasciù coscita l sit www.aisciudaladina.it, doventà ence na ocajion per binèr ensema e publichèr online sacotenc contegnui, ence chi de la edizions di egn passé.
Dai 4 de mé, donca, se pel troèr online scric, retrac e video che revèrda i cent egn de la bandiera ladina, con aprofondimenc storics enjigné en colaborazion con l Union di Ladins de Fascia e con l Union generèla di Ladins de la Dolomites e informazions su de autra scomenzadives che vegnarà metù a jir via per l 2020.
L’Aisciuda ladina l’é na festa voluda e de gran emportanza ence per i bec, che i speta con gran gaissa desche zenza, che te scola, rue Bertol–mascotte de l’event, ma ence gran cognoscidor de l’identità e del lengaz ladin – che dal 2019 en ca l rua con sie pecont e colaborador Bertolin. Purampò i doi personajes no podarà jir fora per la scoles, ma i speta picioi e bec sun chest sit con sorpreises da grignèr.
Ma no demò la neves del 2020. L sit internet bina adum trop del materièl de duta la edizions passèdes de la manifestazion, con chela de poder fèr n viac virtuèl per cognoscer i desvalives argomenc e i protagonisć che te chisc egn à tout pèrt a l’Aisciuda Ladina.
N sit giusta nasciù, ma che podarà seghitèr a crescer, se svilupèr e tegnir i contac con duc i desferenc setores de la comunanza, che fin da la pruma edizion l’Aisciuda Ladina à vardà de arvejinèr.
Donca, descheche aon emparà te chest temp de isolament per stravardèr noscia sanità, l apuntament per duc con l’Aisciuda l é, per endèna, te la rei, enscin a canche no podaron se scontrèr endodanef per durèr te la vita de ogne dì l lengaz ladin e per portèr inant e stravardèr tras la sacotanta ocajions culturèles che vegn metù en esser l’identià de chest popol.
Guarda l’articolo originale su www.lausc.it