Aisciuda Ladina: virtuèla, ma la é!

L coronavirus no fera la scomenzadiva dedichèda a identità e lengaz che da 12 egn vegn metuda a jir al scomenz de mé te Fascia

La é ruèda a la 12^ edizion l’Aisciuda Ladina, la scomenzadiva dedichèda a identità e lengaz che da 12 egn vegn metuda a jir al scomenz de mé te Fascia per endrez del Comun general de Fascia, con si Servijes linguistics, ensema con l’Union di Ladins, l’Istitut Cultural e la Scola de Fascia.

Desche per n muie de etres evenc, ence per chest, che an dò an l’à vardà semper de più de doventèr n moment de condivijion per la comunanza
entrìa, l’emergenza sanitèra coronavirus à metù dant l dubie: él l cajo de l sperlongèr? O piutost de l’anulèr o proèr a l fèr istesc?
La resposta vegnuda fora da la Consulta Ladina, che se à binà chesta setemènes passèdes en videoconferenza, la é peèda via da la proponeta di Servijes linguistics.

No aessa fondament la sburlèr, se no che aisciuda fossel? E no se pel nience la anulèr, ajache la data cernuda per l’aisciuda tol ite da semper i 5 de mé, dì che l’é nasciù la bandiera ladina dai trei colores brun, bianch e vert, e apontin chest an vegn festejà i 100 egn de chesta bandiera, metuda dant per la pruma outa ai 5 de mé del 1920.

L’é stat dezidù coscita de fèr, coche à cognù fèr mingol duc, a peèr via da la scola, na »Aisciuda virtuèla«. Per chest l’é stat lurà per enjignèr na neva piata web dedichèda duta a l’Aisciuda Ladina: n lech de la comunanza olache endèna a se tor sia lèrga sarà prum de dut Bertol, che ajache no l pel jir de persona te la scolines e la scoles de Fascia l se metarà a la leta sul web con matitèdes e jeghes che i bec podarà fèr da cèsa… e l podarà ence ge responer a la letres e la domanes di bec.

No menciarà ben segur na pèrt istituzionèla, olache i referenc de duta la istituzions che laora ensema per tegnir sù l lengaz e l’identità ladina i podarà ge portèr so salut da dalonc a duta la jent de Fascia, e la engaissèr a tegnir dur e jir inant con gaissa ence te chisc momenc senestres.

N partiment de chesta neva majon virtuèla de l’Aisciuda Ladina l sarà dapò ben segur dedicà a la bandiera, per dèr informazions e fèr cognoscer mingol de storia e de curiositèdes sul simbol del popul ladin de la Dolomites.

Su la piata de l’Aisciuda Ladina podarà dapò troèr lèrga i materiai, i retrac, i fruc de duta la edizions passèdes, a na vida da creèr n bel scito ladin olache duc podarà jir a pesćèr e curiosèr, ence la jent che vegn da fora e de autra mendranzes.

Dai 4 de mé ence la neva Aisciuda Ladina ciutarà donca fora da computers, tablet e fonins, e la podarà seghitèr a fiorir ence con la idees, proponetes e consees de duta la comunanza, che pel vegnir tuc sù dai Servijes linguistics del Comun general o ence da l’Union di Ladins, l’Istitut Cultural e la Scola de Fascia.

Endèna tacà a ge pissèr… la setemèna che vegn ve faron saer amò vèlch de più!

LG