• Home
  • |
  • Diarie
  • |
  • L’Aisciuda Ladina la vegn fata tras n nef sit web

L’Aisciuda Ladina la vegn fata tras n nef sit web

L’emergenza sanitèra, met online dai 4 ai 9 de mé la scomenzadives del “Festival del Lengaz”, che te sia doudejẹisema edizion fèsc festa per i 100 egn da l’isituzion de la bandiera ladina

I cent egn de la bandiera ladina, tachèda fora per la pruma outa sun Jouf de Frea ai 5 de del 1920, i doventa, dai 4 ai 9 de mé, l’argoment prinzipèl de la “Aisciuda Ladina – Festival del Lengaz” 2020, portèda inant dal Comun general de Fascia.

Na edizion fora de anter, a cajon da la mesures per l stravardament de la sanità publica tel temp del Coronavirus, che les à cognù fèr pissèr a na neva vida de portèr dant la manifestazion che valorisea e palesa la identità, la cultura e l lengaz de la popolazion fascèna (e no demò): la creazion del sit internet dedicà www.aisciudaladina.it.

Na idea di Servijes Linguistics e Culturèi de l’ent che se cruzia de l’Aisciuda, che doventa ence ocajion per binèr ensema e publichèr online sacotenc contegnui, ence chi de la edizions di egn passé. Dai 4 de mé, donca, se pel troèr, dì per dì, online la scomenzadives che revèrda i cent egn de la bandiera ladina.

Ladins de la Dolomites se met a jir aprofondimenc storics en cont de chest argoment e sun chest sit vedaron ence la autra scomenzadives che vegnarà metù a jir via per l 2020.

L’Aisciuda ladina l’é na festa voluda e de gran emportanza ence per i bec, che i speta con gran gaissa desche zenza, che te scola, rue Bertol – mascotte de l’event, ma ence gran cognoscidor de l’identità e del lengaz ladin – che dal 2019 en cà  l rua con sie pecont e colaborador Bertolin. Purampò i doi personajes no podarà jir fora per la scoles, ma i speta picioi e bec sun chest sit con sorpreises da grignèr.

Ma no demò la neves del 2020. L sit internet bina adum trop del materièi de duta la edizions passèdes de la manifestazion, con chela de poder fèr n viac virtuèl per cognoscer i desvalives argomenc e i protagonisć che te chisc egn à tout pèrt a l’Aisciuda ladina. 

Donca, descheche aon emparà te chest temp de isolament per stravardèr noscia sanità, l’apuntament per duc con l’Aisciuda l’é, per endèna, te la rei, enscin a canche no podaron se scontrèr endodanef per durèr te la vita de ogne di l lengaz ladin e per portèr inant e stravardèr tras la sacotanta ocajions culturèles che vegn metù en esser l’identià de chest popol..

Comun General de Fascia
Strada di Pré de gejia, 2
38036 San Giovanni di Fassa (TN)
tel. +39 0462 764500 fax 763046

Elisa Salvi

ufficio.stampa@comungeneraldefascia.tn.it