Dut chest peton, duta chesta strèdes olache passa n muion de auti e che fèsc ruèr i ghesć te noscia valèdes, duta chesta cèses, duc chisc impianc...
Bensegur per l’economia l é zeche de bon percheche l ghest che rua adarlèrch ne dèsc lurier, l turism l é nosc pan. Sa mont, coi coleamenc, te n senteamen se rua da l’autra man de la val (e adertura te l’autra valèdes...) e se pel se goder de bie panorames. Ma chest ne porta, purampò, ence n gran entesseament e n gran biteboi de sajon, ne porta a sofoèr nosc teritorie, olache ge vegn tout demez teren ai pré e al bosch per fèr su strutures. Cognon capir che l ambient che aon dintorn, l aon rità, e l é n melaur da stravardèr.
Con Vaia aon abù la proes che la natura la pel se rebelèr con duc chisc mudamenc climatics.
Cognon meter vèrda e jir envers a n turism più sostegnibol, tor dezijions che vèlch outa somea più senestres. Cognon cerner mesi più ecologics, la rodes o la linies publiches per se mever, ge fèr cognoscer al ghest ence la vita da bacan e cognon emparèr soraldut a aer respet del bosch e di fruc che l ne sporc. A chesta vida tant l ghest che rua e che ruarà, ma ence nos e la neva generazions che vivon e che vivrà te chest paradis, arà l met de aprijièr e de se goder n teritorie più san. Ma cognon l fèr sobito.
Elsa Zardini
Presidenta de la Union di Ladins de Ampez
Engelbert Mauroner
President de la Lia per Natura y Usanzes
Fernando Brunel
President de la Union di Ladins de Fascia