Vedon che che ge à scrit i bec de la scoles a Bertol en ocajion de l’Aisciuda Ladina e chel che i à podù emparèr e descorir co la maestres endèna na bela spazierèda. N percors scempie e na ocajion per entener che se cogn ge voler ben al ambient.
AISCIUDA LADINA
SCOLINA DE SORAGA
Caro Bertol,
co vala pa? Sion i bec de la scolina de Soraga e volaane te rengraziar de tie dons che tu ne as fat ruar te scolina.
Ence chest an assane volù che tu vegnisse a ne troar, ma saon che per via de chesta petorcena del Covid no tu pes. Speron dalbon de se scontrar n auter an duc ensema ence con Bertolin.
Cognon te contar na bela nev a chest an che l’Aisciuda Ladina rejona de nosce reisc e de ambient, ence noi aon fat noscia bela enrescida.
Na dì de mé, endana che eraane a far na bela raida entorn paìsc, aon podù fotografar ti pré tante sòrt de fiores de vigni color: primule ṥ ale, fiores da le zucorie, schiopes e enscinamai n tulipan chécen mìngol giacià, ma tant delicat.
Da zeche ora endana che jiane a descorir noscia bela natura se aon ascort che no l’era demò erba neva, albres con picoi buc, fiores e neves sbarboi, ma ence de auter.
Aon troà papieres, toc de plastica e vierech, brocole de le boc e de l’aga e ence palete de legn del giacin.
No ne saea vera co él possibol che te n scì bel vidor vejin al lach podessa esser scì tenc refudames peté stroz?
Aon tacà a far domane a nosce maestre e duc ensema te scolina aon fat n esperiment. Te n bossol aon semenà mìngol de “erba giat” e l’aon scuerta con dute chele burte robe che aon troà stroz. Te n auter bossol enveze aon semenà zenza scuerjer la tera con nia lascian che sibie i raes del soreie e l’aga a far crescer l’erba. Se aon domanà: sarala bona de crescer l’erba ence se l teren l’é scuert da tan te scoadie?
Sion dò che speton de veder che che sozet, sion muie curiousc.
Aon pissà enlonch sui efec che à l pech respet de l’ambient. Aon proà a capir che che suzet canche sepeta l refudam stroz, e canche se peta porcarìe che vanza dò na raida sa mont te ruf. Aon ence fat n auter pìcol esperiment: te na mastela piena de aga neta aon metù ite n carton de n such de fruc schicià fora, n toch de pan e marmelada e n sachet de patatine. Se aon domanà: l’aga resterala neta o se mocignarala?
Sion stac duc muie contenc de far cheste enrescide ensema a le maestre e a la fin aon declarà che:
“NO COGNON TRAR STROZ REFUDAM E MOCIGNAR NOSCIA BELA NATURA,
CANCHE JON SA MONT COGNON LASCIAR NET E SE PORTAR D Ò NESC REFUDAMES E
NO I LASCIAR STROZ SUI PR É E SUI MONC,
CHI CHE MOCIGNA LA NATURA NO L’É NA VALENTA PERSONA CHE À A CHER NOSCIA TERA.
Speron de far duc nosc pìcol toch ajache l mond per jir inant l’à de besegn de nosc amor e noscia cura.
Caro Bertol te rengrazion per ne aer fat pissar e lurar su chest tem coscita emportant.
Te manon n gran braciacol e speron de te scontrar n auter an.
Bona aisciuda ladina da duc i bec e l personal de la scolina de Soraga.